३१ जेठ, काठमाडौं । संयुक्त राष्ट्रसंघले आफ्नो प्रारम्भिक अनुसन्धानमा इजरायल र हमास दुवै गाजा युद्धका लागि जिम्मेवार रहेको बताएको छ । इजरायलको कारबाहीले सर्वसाधारणको ज्यान जानुलाई मानवता विरुद्ध भएको टिप्पणी राष्ट्रसंघको छ ।
राष्ट्रसंघले दुईवटा समानान्तर प्रतिवेदनका आधारमा यस्तो निष्कर्ष निकालेको हो । जसमा पहिलो रिपोर्ट अक्टोबर ७ मा हमासले गरेको हमलाको बारेमा थियो भने दोस्रो रिपोर्ट इजरायलको प्रतिक्रियामा गरिएको कारबाहीमा आधारित छ ।
संयुक्त राष्ट्रसङ्घीय छानबिन आयोग (सीओआई) ले यो प्रतिवेदन व्यापक रूपमा प्रमाण संकलन गरी दोषीको पहिचान गरी सार्वजनिक गरेको जनाएको हो । जसमा इजरायल र कब्जा गरिएको प्यालेस्टिनी क्षेत्रहरूमा गरिएका आक्रमणहरू समावेश छन् ।
सीओआईले इजरायलले आयोगलाई सहयोग नगरेको र काममा बाधा पु¥याएको पनि उल्लेख गरेको छ । इजरायलले अनुसन्धानकर्ताहरुलाई इजरायल र कब्जा गरिएको प्यालेस्टिनी क्षेत्रहरूमा पुग्न पनि रोक लगाएको थियो ।
तर, इजरायली कूटनीतिज्ञहरूले जेनेभामा संयुक्त राष्ट्र आयोगको प्रतिवेदनलाई अस्वीकार गरेका छन् । उता प्रतिवेदनमा हमासको तर्फबाट भने कुनै प्रतिक्रिया आएको छैन ।
इजरायलका अनुसार अक्टोबर ७ मा सीमाबाट भएको आक्रमणमा १२ सयभन्दा बढी व्यक्तिको मृत्यु भएको थियो भने २५० जनालाई बन्धक बनाएको थियो । यसपछि गाजामा जवाफी सैन्य कारबाही गरिएको छ ।
प्यालेस्टिनी अधिकारीहरुले सार्वजनिक गरेको तथ्याङ्कका अनुसार इजरायलका कारण ३७ हजारभन्दा बढी मानिसको मृत्यु भइसकेको छ ।